N/A ရဲ့ N/A

             ငယ်ငယ်တုန်းက ကျောင်းမှာ ဗလာစာအုပ်အသစ်ထုတ်ရသလိုပါပဲ။ အဖုံးလေးသေချာဖုံး၊ ပြီး ဘေးမျဉ်းတွေဘာတွေ ကြိုပြီးတားထား၊ နောက်ဘယ်လို သပ်သပ်ရပ်ရပ် ရေးပစ်လိုက်မယ်ဆိုပြီး ကြိုတင်စိတ်ပိုင်းဖြတ်ထား၊ အခုအဖြစ်က အဲဒီလိုအဖြစ်မျိုး တပုံစံထည်းပါပဲ။

            အရင်ဘလော့က အကြောင်းကြောင်းကြောင့် ပျက်သွားခဲ့ပြီ။ ဒါနဲ့ အသစ်တခုပြန်စမယ်ဆိုပြီး အခုဒီဘလော့လေးကို စလုပ်ပါတယ်။ အရင်ဘလော့တုန်းကတော့ ရေးခဲ့တာတွေက ဟိုတတို့ ဒီတတို့ပေါ့။ ဒီဘလော့မှာ  ဘာတွေကို ဘယ်က စရေးမလဲလို့ ကိုယ်ကိုယ်ကို ပြန်မေးကြည့်တော့ ဘယ်ကစရမှန်းမသိ။

            ပထမဆုံးကိုယ်ကိုယ်ကို မေးမိတာကတော့ ဘာလို့ ရေးချင်ရတာလဲပေါ့။ အဖြေ တိတိကျကျမရှိပါ။ ကျောင်းသားဟောင်းတွေ စုထောင်ထားတဲ့ Network မှာ အချင်းချင်းနောက်ချင်လို့ စာတိုတိုလေးတပုဒ်စရေးဖြစ်ရာက အရင် ဘလော့လေးလုပ်ဖြစ်သည်အထိ ဖြစ်လာခဲ့ပါတယ်။ ဘလော့ရေးနေသူ အများစုကတော့ မိမိရေးချင်တာ၊ ပေးချင်တာ စတာတွေနဲ့ ကိုယ်ကိုယ်ကို သတ်မှတ်ပိုင်းဖြတ်ပြီး စနစ်တကျရေးနေကြပါတယ်။ ကျွန်တော့်မှာသာ အသစ်ရောဂါတက်နေတာပါ။ ဒါနဲ့ ဟိုဖတ်ဒီဖတ်လုပ်မိတော့ လူတွေဘာလို့ ဘလော့လုပ်ကြလဲဆိုတဲ့ စစ်တမ်းလေးကိုတွေ့မိပါတယ်။

            လွန်ခဲ့တဲ့ ၂ နှစ်ကစစ်တမ်းလေးပေါ့။ ဒါကိုတွေ့တော့ ကျွန်တော်လဲ ကိုယ့်ကိုယ်ကို For Pleasure ထဲပါတယ်လို့ ဆုံးဖြတ်နိုင်သွားပါတယ်။ အဲဒီအတွက်ရေးမယ်ပေါ့ခင်ဗျာ။ ဒီတော့ဘာတွေရေးမလဲ ဆိုတာထပ်မေးမိပါတယ်။ ရောက်နေကြ၊ ဖတ်နေကြ ဘလော့တွေကို တခါထပ်လည်မိပါတယ်။ တချို့က ဒီဘလော့လာရင် အသိတိုးစေရယ်ဆိုတဲ့ ရည်ရွယ်ချက်နဲ့ရေးနေကြပါတယ်။ တချို့က ရသတွေ အတွေးတွေရစေပါတယ်။ တချို့က ခင်မင်စရာကောင်းတဲ့စာတွေရေးနေကြသလို၊ တချို့က စိတ်လက်ပေါ့ပါး ရွှင်လန်းစေပါတယ်။ ဒါတွေတွေ့လေ သဘောကျလေ ကျွန်တော့်မှာ ----- ( or ) ----- ( or ) ----- ( or ) တွေ တသီတတန်းကြီးဖြစ်လာလေပေါ့။

            နောက်ဆုံးတော့ ကိုယ့်ဘာသာ ဆုံးဖြတ်မိတာကတော့ အရင်လိုပဲပေါ့ပေါ့ပါးပါး ပဲရေးတော့မယ်။ ဘာတွေပဲရေးမယ်ဆိုတဲ့ နှောင်ကြိုးမထားတော့ပါ။ မူလတန်း စာအုပ်ထဲက ဖတ်စာတပုဒ်လို စေစောထ၊ အိပ်ချင်မူးတူးဖြစ်၊ သွားတိုက်၊ မျက်နှာသစ် ကအစချီပြီး နောက်ဆုံး အိပ်ရာဝင်သည်အထိ တနေ့တနေ့ တနင့်တပိုး သယ်ဆောင်သွားခဲ့ရတာတွေရေးမယ်၊ ကိုယ်ရောက်ခဲ့ရာ နေရာဒေသမှ ကိုယ်အတွက် ထူးဆန်းတာတွေ၊ ပြုံးစရာတွေ၊  ခံစားမိတာတွေရေးမယ်။ မိသားစုဘ၀ထဲက အမြဲမှတ်မိနေမိချင်တဲ့ အဖြစ်တချို့ကို တေးထားမယ်၊ ဒီလိုပဲဆုံးဖြတ်မ်ိပါတယ်။ သတိထားစရာကတော့ သူတဖက်သားအကြောင်းတွေ မရေးမိစေဖို့၊ ရေးတဲ့အထဲ ပါမလာမိစေဖို့ပါ။

            ဒီတော့ ဒီဘလော့မှာ ကျွန်တော်ဆိုတဲ့ လူထဲက လူတယောက်အကြောင်း၊ သူ့ရဲ့ ရိုးရိုးသာမန်အတွေး တချို့အကြောင်း၊ သူ့ရဲ့ တနေ့တာထဲမှ အပိုင်းအစ တချို့အကြောင်း တွေသာ ရေးဖြစ်ပါမည်။ ဖတ်ပျော်အောင်တော့ ကြိုးစားပြီးရေးပါမည်။

Ref : http://www.chrisg.com/why-people-blog

Ref :  http://socialmediatoday.com/jasonbaer/276485/lifting-fog-blog-8-strategic-questions-you-write-1-word